نتھووالا فٹبال ٹورنامنٹ : مظہر کلب کوٹ نظام دین نے جیت لیا

ننکانہ صاحب(نمائندہ نوائے وقت) ساتواں جشن نتھووالا آل پاکستان فٹ بال ٹورنامنٹ مظہر فٹ بال کلب کوٹ نظام دین نے جیت لیا۔فائنل میچ مظہر فٹ کلب کوٹ نظام دین اور بابا کارگو فٹ بال کلب لاہور کے مابین کھیلا گیا۔دونوں ٹیموں میں قومی اور مختلف محکموں کی ٹیموں کے نامور کھلاڑیوں کی شمولیت کی وجہ سے فائنل میچ سنسنی خیز ثابت ہوا اور مقررہ وقت تک میچ ایک ایک گو ل برابر تھا۔ میچ کا فیصلہ پنلٹی ککس پر ہوا جس میں مظہر فٹ بال کلب نے 2 کے مقابلے میں 3 گولوں سے کامیابی حاصل کی۔سماجی رہنما حاجی محمد رمضان فائنل میچ کے مہمان خصوصی تھے جنہوں نے جیتنے والی ٹیم کو ٹرافی اور 60 ہزار نقد جبکہ دوسری پوزیشن حاصل کرنے والی ٹیم کو ٹرافی اور 40 ہزار روپے نقد انعام دیا۔ٹورنامنٹ میں ملک بھر سے فٹ بال کی 16 معروف ٹیموں نے حصہ لیا۔شائقین نے بہترین ٹورنامنٹ کے انعقاد پر منتظمین آصف رشید ،میاں عرفان اسلم،میاں شہزاد گلزار،میاں آفتاب احمد اور میاں عابد امین کی کاوشوں کو سراہا۔