پاکستان میں بھارت سے زیادہ باصلاحیت کھلاڑی موجود: عبدالرزاق

 ملتان (سپورٹس ڈیسک) قومی ٹیم کے سابق آل راؤنڈر عبدالرزاق نے کہا کہ بابر اعظم انٹرنیشنل کرکٹ کے تمام ریکارڈ توڑنے کی اہلیت رکھتا ہے۔ عبدالرزاق نے کہا کہ بابراعظم کا بھارتی کپتان ویرات کوہلی سے موازنہ کرنا غلط ہے، آپ بھارتی کھلاڑیوں کا موازنہ پاکستانی کھلاڑیوں سے نہیں کرسکتے کیونکہ پاکستان میں زیادہ باصلاحیت کھلاڑی موجود ہیں۔عبدالرزاق نے کہا کہ ویرات کوہلی اور بابر اعظم بالکل مختلف کھلاڑی ہیں، اگر ہم ان دونوں کا موازنہ کرنا چاہتے ہیں تو پھر یہ ضروری ہے کہ پاکستان اور بھارت کا میچ کروائیں اور پھر فیصلہ کریں کہ کون زیادہ بہتر ہے۔ بابراعظم زیڈ ٹی بی ایل میں 5 سے 6 سال تک میرے ماتحت کھیلتا رہا اور میں نے انہیں کبھی کپتان کے عہدے سے نہیں ہٹایا۔عبدالرزاق نے کہا کہ بابراعظم باصلاحیت اور اچھا بیٹسمین ہے، اس نے خود کو عالمی سطح پر منوا لیا ہے۔