اپوزیشن جتنی شیروانیاں سلوائے ہم نے ہتھکڑیاں بنوا رکھی ہیں: فرخ حبیب

حافظ آباد (نمائندہ نوائے وقت + نمائندہ خصوصی + نامہ نگار) وزیر مملکت برائے اطلاعات فرخ حبیب نے میڈیا سے گفتگو کرتے ہوئے کہا ہے کہ اپوزیشن والے جتنی چاہے شیروانیاں سلوالیں ہم نے ان کے لئے ہتھکڑیاں بنوا کر رکھی ہوئی ہیں۔ عدم اعتماد ناکام ہوگی، ان سے 172بندے پورے نہیںہو رہے۔ فضل الرحمن کس منہ سے کہہ رہے ہیں کہ اگر تحریک عدم اعتماد ناکام ہوگئی تو ملک میں انارکی پیدا ہوگی۔ دراصل یہ ملک میں تصادم پیدا کرنے کی کوشش کر رہے ہیں۔ یہ چاہتے ہیں کہ انکی کسی طرح کرپشن بچ جائے۔ ہمیں انکی سب سازشوںکا پتہ ہے۔ عمران خان نے صوابدیدی فنڈز کو ختم کیا۔ غریب آدمی کو عمران خان تین مرلہ، پانچ مرلہ، دس مرلہ کا مالک بنا رہا ہے۔ ملک میں فیکٹریاں لگ رہی ہیں۔ ہماری ٹیکس کولیکشن آگے بڑھ رہی ہے۔ غریب آدمی کو دس لاکھ کا ہیلتھ کارڈ مل رہا ہے۔ قوم عمران خان کے ساتھ ہے۔ میں نے حافظ آباد شہر کی وزٹ کی ہے یہاں کے عوام میں عمران خان کے کل کے جلسہ عام کے سلسلہ میں خاصا جوش وخروش پایا جا رہا ہے۔ اس موقع پر ایم این اے شوکت علی بھٹی بھی انکے ہمراہ موجود تھے۔