صدر زرداری کی مزار قائد پر حاضری‘ ترک صدر کا فون‘ مبارکباد دی

اسلام آباد (نمائندہ خصوصی) صدر مملکت آصف علی زرداری نے بانی پاکستان قائداعظم محمد علی جناح کے مزار پر حاضری دی۔  صدر مملکت آصف علی زرداری نے صدارتی منصب سنبھالنے کے بعد پیر کو مزار قائد پر حاضری دی اور فاتحہ خوانی کی۔ مزار قائد پہنچنے پر صدر مملکت کو گارڈ آف آنر پیش کیا گیا۔ صدر آصف علی زرداری نے بانی پاکستان کو خراج عقیدت پیش کیا۔ انہوں نے مہمانوں کی کتاب میں اپنے تاثرات بھی درج کئے۔ دوسری طرف ترکیہ کے صدر رجب طیب اردگان نے  صدر آصف علی زرداری کو ٹیلی فون کیا۔ ترک صدر رجب طیب اردگان نے صدر پاکستان کا عہدہ سنبھالنے پر صدر آصف علی زرداری کو مبارکباد دی۔ دونوں صدور  نے  دوطرفہ اہمیت کے امور پر تبادلہ خیال کیا۔ دونوں صدور نے باہمی دلچسپی کے تمام شعبوں میں تعاون مزید بہتر بنانے کی ضرورت پر زور دیا۔ صدر آصف علی زرداری نے ترک صدر کے ٹیلیفون، نیک تمناؤں پر ان کا شکریہ ادا کیا۔ صدر آصف علی زرداری نے ترکیہ کی عوام کو رمضان المبارک کی مبارکباد دی۔ صدر مملکت نے جلد ہی صدر رجب طیب اردگان کو پاکستان مدعو کرنے کی خواہش کا اظہار بھی کیا۔