لاہور(سپورٹس رپورٹر)صوبائی وزیر کھیل پنجاب فیصل ایوب کھوکھرسے اولمپئن ارشد ندیم نے نیشنل ہاکی سٹیڈیم میں ملاقات کی ہے، انہوںنے کہا ہے کہ پیرس اولمپکس کیلئے سپورٹس بورڈ پنجاب ارشد ندیم سے ہر ممکن تعاون کریگا۔ ارشد ندیم کی ٹریننگ کیلئے جو بھی وسائل درکار ہونگے فراہم کئے جائیں گے،محکمہ سپورٹس کی جانب سے پنجاب سٹیڈیم لاہور میں ارشد کی ٹریننگ کی سہولت کیلئے فوکل پرسن تعینات کیا جائیگا،ارشد ندیم سٹیڈیم میاں چنوں میں تعمیراتی کام جلد شروع کیا جائیگا۔اولمپئن ارشد نے تعاون پر صوبائی وزیر کھیل کا شکریہ ادا کیا۔صوبائی وزیرکھیل پنجاب فیصل ایوب کھوکھر سے چیس ایسوسی ایشن پنجاب کے وفد نے نیشنل ہاکی سٹیڈیم میں ملاقات کی ہے، سیکرٹری چیس ایسوسی ایشن گوہر اقبال، فنانس سیکرٹری سردار عرفان اور رفیع جمال موجود تھے۔صوبائی وزیرکھیل نے کہا ہے کہ ملکی تاریخ میں چیس کے سب بڑے ایونٹس کیلئے لائحہ عمل تیار کررہے ہیں۔