ویسٹ انڈیز میں جاری تیسرے ٹی ٹوینٹی ورلڈ کپ کے سیمی فائنل کا مرحلہ آج سے شروع ہورہا ہے۔ انگلینڈ اورسری لنکا کے درمیان پہلا سیمی فائنل میچ پاکستانی وقت کے مطابق رات ساڑھے آٹھ بجے شروع ہوگا ۔ دوسرا سیمی فائنل دفاعی چیمپئن پاکستان اور آسٹریلیا کے مابین کل کھیلا جائے گا۔ ٹورنامنٹ کا فائنل سولہ مئی اتوار کو رات ساڑھے آٹھ بجے ہوگا۔ ادھرپاکستان کرکٹ ٹیم کے کپتان شاہد آفریدی کا کہنا ہے کہ قوم کی دعاؤں سے ہم سیمی فائنل میں پہنچ گئے ہیں تاہم اب سب کھلاڑیوں کو کارکردگی دکھانا ہوگی ۔ پاکستانی کپتان نے کہا کہ ورلڈ کپ میں کامیابی کے لیے تمام کھلاڑی پرعزم ہیں اور وہ انشاء اللہ ورلڈ کپ جیت کر وطن واپس آئیں گے۔