قابل فخر خدمات، پاک فضائیہ کے افسروں، ائر مین کو ملٹری اعزازات دیئے گئے

اسلام آباد (این این آئی)پاک فضائیہ کے افسران اور ائیرمین کو قابلِ فخر خدمات پر آپریشنل اور نان آپریشنل ملٹری اعزازات دیئے گئے۔ جمعرات کو ایئر ہیڈ کوارٹرز اسلام آباد میں منعقد ہونے والی اس تقریب کے مہمان خصوصی پاک فضائیہ کے سربراہ ائیر چیف مارشل سہیل امان تھے۔ پاک فضائیہ کے 30 افسران کو ستارہ امتیاز (ملٹری)، 16افسران کو تمغہ امتیاز (ملٹری) جبکہ 8 افسران کو تمغہ بسالت سے نوازا گیا۔ 15جونیئر کمیشنڈ افسران کو تمغہ خدمت ملٹری (درجہ اول) عطا کئے گئے۔ یہ اعزازات ان کو پاک فضائیہ میں ان کی بہترین خدمات کے اعتراف کے طور پر دئیے جاتے ہیں، تقریب میں بڑی تعداد میں پاک فضائیہ کے اعلٰی حکام، افسران اور ائیر مین نے شرکت کی۔