صحافی کو دھمکانے کا کیس:فیصل جاوید کے خلاف مقدمے کی سماعت 8جولائی تک ملتوی

اسلام آباد کی ڈسٹرکٹ اینڈ سیشن عدالت نے پاکستان تحریک انصاف کے رہنما فیصل جاوید کے خلاف صحافی کو دھمکانے اور جھگڑا کرنے کے مقدمے کی سماعت 8جولائی تک ملتوی کردی۔فیصل جاوید کے خلاف کیس کی سماعت سول جج قدرت اللہ نے کی، فیصل جاوید کے وکیل سردارمصروف عدالت میں پیش ہوئے اور اپنے موکل کی جانب سے حاضری سے استثنی کی درخواست دائر کی۔عدالت نے فیصل جاوید کی حاضری سے استثنی کی درخواست منظور کرتے ہوئے ان کے وکیل سے استفسار کیا کہ کیا اس مقدمے میں صرف ایک ملزم ہے؟اس پر وکیل نے عدالت کو آگاہ کیا کہ جی بس ایک بندے کے خلاف مقدمہ درج ہے۔بعد ازاں عدالت نے کیس کی سماعت 8 جولائی تک ملتوی کردی۔13 مارچ کو ڈسٹرکٹ اینڈ سیشن کورٹس اسلام آباد نے صحافی کو دھمکانے، جھگڑنے کے کیس میں پاکستان تحریک انصاف کے رہنما اور سابق سینیٹر فیصل جاوید پر فرد جرم عائد کر دی تھی۔