کوٹ ادو(خبر نگار)نئے تعینات ہونے والے اسسٹنٹ کمشنر محمد اختر منڈھیرا نے گزشتہ روز اے سی آفس میں صحافیوں سے ملاقات کی ، اس موقع پر اختر منڈھیرا نے کہا کہ کوٹ ادو میں جو ترقیاتی کام ادھورے چھوڑ کر 2سال پہلے گیا تھا ان کو دوبارہ شروع کرنا ہے، صحافیوں سے مل کر شہر کی تعمیر وترقی بارے نئے ارادے سے کام شروع کرنا ہوگا،گنے کی کریشنگ کا سیزن بھی شروع ہونے والا ہے گنے کی ملوں کے چلنے سے پہلے پہلے ملوں کو جانے والے روٹس کا معائنہ کرکے ٹریفک بلاک ہونے کا مسئلہ بھی ایک اہم مسئلہ ہے جس کے بارے میں ملز انتظامیہ سے مل کر بھی لائحہ عمل بنائیں گے اس کے علاوہ تحصیل بھر کے جو بھی مسائل ہوں گے ان کو انجمن تاجران کی مشاورت سے بھی حل کیا جائے گا۔