عمران جی بی کے مقبول ترین لیڈر، مریم بلاول ملاقات ان کی شکست کا پتہ دے رہی ہے: شبلی فراز

اسلام آباد (وقاع نگار خصوصی، آئی این پی) وفاقی وزیر اطلاعات شبلی فراز نے کہا ہے کہ بلاول، مریم ملاقات گلگت بلتستان انتخابات میں ان جماعتوں کی شکست کا پتہ دے رہی ہے۔ جمعرات کو سینیٹر شبلی فراز نے اپنے ٹویٹ میں کہا کہ مریم نواز اور بلاول بھٹو اب دھاندلی کا ڈھول پیٹنے کا نیا منصوبہ تیار کریں گے۔ ان کیلئے انتخابات صرف وہ شفاف ہے جس میں یہ جیتیں۔ ایسی ملاقاتیں پی ڈی ایم کے تاریک مستقبل کو روشن نہیں بنا سکتیں۔ سینیٹر فیصل جاوید نے کہا ہے کہ گلگت بلتستان میں مقبول ترین لیڈر عمران خان ہی ہیں۔ پی ٹی آئی آرام سے الیکشن جیت جائے گی۔ جمعرات کو نجی ٹی وی پروگرام میں گفتگو کرتے ہوئے انہوں نے کہا گلگت بلتستان  میں پی ٹی آئی آرام سے الیکشن جیت جائے گی۔ گیلپ سروے آیا، جی بی میں مقبول ترین لیڈر عمران خان ہی ہیں۔ فیصل جاوید کا کہنا تھا کہ دونوں جماعتیں جی بی میں حکومت کرچکیں، کیا کچھ نہیں، جی بی کے عوام ان دونوں جماعتوں پر اعتماد نہیں کرتے، یہ لوگ اکٹھے نہیں، نہ کوئی نظریہ ہے بس کرپشن بچانا مقصد ہے۔ سیاسی بہروپیوں کا جمہوری لبادہ اتر کر قوم کے سامنے آرہا ہے۔ آئے روز موقف سے پھرنے والے عوام کی رہنمائی کے لائق نہیں۔