لاہور(سپورٹس رپورٹر)دورہ ویسٹ انڈیز کیلئے انگلینڈ کرکٹ ٹیم نے ون ڈے اور ٹی ٹونٹی سکواڈز کا اعلان کر دیا ہے۔انگلینڈ ٹیم ویسٹ انڈیز میں3 ون ڈے اور 5 ٹی ٹونٹی میچز کی سیریز کھیلے گی، ون ڈے میچز 3، 6 اور 9 دسمبر کو ہوں گے جبکہ ٹی ٹونٹی میچز 12، 14 ،16 ،19 اور 21 دسمبر کو کھیلے جائیں گے۔ورلڈکپ میں ناقص کارکردگی کے بعد انگلینڈ کے ون ڈے سکواڈ میں اکھاڑ پچھاڑ ہونے لگی ہے، کپتان جوز بٹلر سمیٹ ورلڈ کپ سکواڈ کے صرف 6 کھلاڑی جگہ برقرار رکھنے میں کامیاب رہے ہیں، ہیری بروک، گس ایٹکنسن، برائیڈن کارس، سیم کرن اور لیام لیونگسٹن جگہ برقرار رکھ سکے۔ ون ڈے سکواڈ سے ڈراپ ہونے والے کھلاڑیوں میں جو روٹ، بین سٹوکس، جونی بیئرسٹو، معین علی، عادل رشید، ڈیوڈ ملان، مارک ووڈ اورکرس ووکس شامل ہیں۔ دوسری جانب ٹی ٹونٹی سکواڈکی کپتانی بھی جوز بٹلر کو سونپی گئی ہے جبکہ عادل رشید، معین علی اور کرس ووکس ٹی ٹونٹی سکواڈ میں شامل کیا گیا ہے۔