کئی وارداتیں‘ حافظ آباد  خاتون وکیل کے گھر ڈیڑھ کروڑ کی ڈکیتی‘ کاہنہ نوجوان زخمی 

لاہور‘ حافظ آباد (نامہ نگار‘ نمائندہ نوائے وقت) شہر کے مختلف علاقوں میں ڈاکوؤں اور چوروں نے چوری و ڈکیتی کی وارداتوں میں متعدد شہریوں سے لاکھوں روپے، زیورات، موبائل فون، موٹر سائیکلیں ، گاڑیاں اور دیگر سامان لوٹ لیا جبکہ کاہنہ کے علاقہ میں موٹرسائیکل سوار ڈاکوؤں نے ڈکیتی مزاحمت پر فائرنگ کرکے دکان دار کو زخمی کر دیا۔ ڈاکوؤں نے کاہنہ شہزادہ گاؤں میں سیمنٹ بجری ودیگر بلڈنگ میٹریل کی دکان میں ڈکیتی کی واردات کے دوران مزاحمت کرنے پر 45 سالہ دکاندار اقبال کو فائرنگ کرکے زخمی کر دیا۔ زخمی اقبال کو طبی امداد کیلئے ہسپتال منتقل کر دیا گیا ہے۔ ڈاکوؤں نے باغبانپورہ میں ساجد اور اس کی فیملی سے ساڑھے 5 لاکھ‘ زیورات اور موبائل فون، مانگا منڈی میں ادریس سے 3 لاکھ 85 ہزار‘ موبائل فون، ہربنس پورہ میں بدر سے 2 لاکھ 45 ہزار‘ موبائل فون، گلشن راوی میں اسد سے ایک لاکھ 40 ہزار‘ موبائل فون، ساندہ میں کاشف سے ایک لاکھ 12ہزار‘ موبائل فون، شاہدرہ میں رمضان سے ایک لاکھ 65 ہزار‘ موبائل فون، یکی گیٹ دانش سے35 ہزار ‘موبائل فون لوٹ لیا۔ چوروں نے گرین ٹاؤن، قائداعظم انڈسٹریل اسٹیٹ اور مانگا منڈی سے 3 گاڑیاں جبکہ راوی روڈ، کاہنہ، مصطفی آباد، غالب مارکیٹ، غازی آباد، نصیر آباد، سندر اور چوہنگ سے 8 موٹر سائیکلیں چوری کرلیں۔ حافظ آباد‘ سکھیکی میں خاتون وکیل کے گھر ڈیڑھ کروڑ سے زائد کی ڈکیتی‘ 6نامعلوم مسلح ڈاکو گھر سے 70تولے زیورات اور 15لاکھ نقدی لوٹ کر فرارہوگئے۔6مسلح ڈاکو شازیہ بتول ایڈووکیٹ کے گھر داخل ہوئے۔پولیس نے نامعلوم ملزموں کیخلاف مقدمہ درج کرلیا۔