جنرل ندیم کی ائیرچیف کیساتھ ایف  16 میں پرواز، جنگی مشق میں حصہ لیا

اسلام آباد (سٹاف رپورٹر) چیئرمین جوائنٹ چیفس آف سٹاف کمیٹی جنرل ندیم رضا نے گزشتہ روز پاک فضائیہ کے ایک آپریشنل بیس کا دورہ کیا۔ آئی ایس پی آر کے مطابق  ائر چیف مارشل مجاہد انور خان نے ان کا خیر مقدم کیا۔ یہاں انہوں نے فضائیہ کی جنگی تیاری ملاحظہ کی۔ وہ  آپریشنل یونٹ گئے جہاں انہوں نے ایک ایف سولہ میں فارمیشن کی شکل میں ائر چیف کے ساتھ پرواز کی اور  اس پرواز کے دوران کمپیوٹر سیمولیشن کے ذریعہ ایک جنگی  مشق کی گئی۔ بیس پر گفتگو کرتے ہوئے جنرل ندیم رضا نے پی اے ایف کے فضائی  جنگجوئوں کی لگن اور  پیشہ ورانہ مہارت کی تعریف کی۔ انہوں نے جدید جنگوں کے دور میں  کامیابی کیلئے مسلح افواج کے درمیان ہم آہنگی کی  اہمیت اجاگر کی۔ انہوں نے کہا کہ جدید ترین ٹیکنالوجی کے علاوہ ، پی اے ایف کے  ملازمین کا عمدہ مورال، اسے  ایک بے مثال فورس بناتا ہے۔