وزیر اعظم عمران خان کے معاون خصوصی شہباز گِل نے کہا ہے کہ جادو ٹونے کی باتیں ہمیں نہ سنائیں، جادو ٹونے، جنات کی باتیں آپ کے منہ سے اچھی نہیں لگتیں۔ نون لیگ کی نائب صدر مریم نواز کے بیان پر ردعمل دیتے ہوئے وزیر اعظم کے معاون خصوصی شہباز گِل نے اپنے بیان میں کہا کہ آپ کے پیسے کون سے جنات یا چڑیلوں نے بیرون ملک منتقل کیے۔شہباز گِل نے کہا کہ  نواز شریف بنا نہیں جاسکتا وہ پیدا ہوتا ہے۔انہوں نے مزید کہا کہ نوازشریف روز پیدا نہیں ہوتے، ہر 200 سال بعد پیدا ہوتے ہیں، پہلے نواز شریف میر جعفر کی شکل میں پیدا ہوئے تھے۔ شہباز گل کا کہنا تھا کہ آج ایک بار پھر مریم صفدر نے ہمیشہ کی طرح عدالت میں جھوٹ بولے۔شہباز گل نے کہا کہ مریم صفدرنے آج بھی عدالت میں رسیدیں نہیں دیں ، مریم صفدرنے قطری خط کی طرح یہ نہیں بتایا کہ رسیدیں کہاں ہیں ؟معاون خصوصی نے مزید کہا کہ  شریف فیملی نے تاجروں سے بھتہ وصول کیا اور باہر بھجوایا ، شریف خاندان سے پاکستان کا کوئی ادارہ محفوظ نہیں رہا ،اجمل قصاب اور کلبھوشن کے معاملے پر شریف فیملی نے ملک دشمنی دکھائی۔شہباز گل نے کہا کہ مریم صفدر نے ٹھیک کہا نواز شریف کی طرح کوئی نہیں بن سکتا ،اتنا دھوکے باز واقعی کوئی نہیں بن سکتا۔واضح رہے کہ مسلم لیگ نون کی نائب صدر مریم نواز نے حکومت پر تنقید کرتے ہوئے کہا تھا کہ یہ ملک کی اہم ترین تقرریاں جادوٹونے سے کرتے ہیں، وزیراعظم کی بجائے جنات تقرریاں یا طوطا فال نکالتے ہوں تو تماشا بننا حیرانگی کی بات نہیں ہے.