اسلام آباد (نمائندہ نوائے وقت) سابق وفاقی وزیر اسد عمر نے میڈیا سے گفتگو کرتے ہوئے سپریم کورٹ فیصلہ سے متعلق کہا کہ کل کا فیصلہ درست ہے۔ نواز شریف کی وطن واپسی سے متعلق سوال پر اسد عمر نے کہاکہ اس فیصلے کے بعد یہ اچھا سوال ہے کہ نواز شریف واپس آئیں گے یا نہیں، سپریم کورٹ فیصلہ کے بعد شہباز شریف کیوں خوش ہے؟۔ یہ میرا معصومانہ سوال ہے آپ سے، ایک فیصلے پر تحریک انصاف بھی خوش ہے اور شہباز شریف بھی خوش ہے۔ سائفر کیس میں ریلیف سے متعلق سوال پر اسد عمر کا کہنا تھا کہ سائفر کیس میں الزام یہ ہے کہ جن کو ملا انھوں نے ٹھیک استعمال نہیں کیا، ہمارا ماننا ہے کہ قانونی استعمال کیا ہے، سائفر چار لوگوں میں آتا ہے، وزیراعظم، وزیر خارجہ، آرمی چیف اور ڈی جی آئی ایس آئی، پلاننگ منسٹر کہاں سے آگیا۔ ایف آئی آر میں میرا نام صرف آیا ہے: اسد عمر نے عثمان ڈار اور صداقت عباسی کی طرح پروگرام میں جانے سے متعلق سوال کے جواب میں کہا کہ اگر میں نے کوئی ایسا کام کرنا ہوتا تو کر چکا ہوتا۔