لاہور(سپورٹس رپورٹر)انٹرنیشنل کرکٹ کونسل ورلڈکپ میں پاکستان‘ بھارت ٹاکرے کی وجہ سے ہوٹلز کے کرایوں میں اضافہ کیا ہوا شائقین مبینہ طو ر پر میچ دیکھنے کیلئے ہسپتالوں میں بکنگ کروانے پہنچ گئے۔ شہر میں ہوٹلوں کے کرائے آسمان سے باتیں کر رہے ہیں۔ ورلڈکپ کے بڑے میچ سے پہلے ہسپتالوں میں مبینہ مریضوں کے بکنگ کی تعداد بڑھ گئی،شائقین میچ سے ایک دن پہلے ہسپتالوں میں بکنگ کروانے لگ گئے۔ مبینہ مریض ہوٹل کے کرایوں میں اضافے کی وجہ سے ہسپتال میں رک کر میچ دیکھنا چاہتے ہیں۔احمد آباد میڈیکل ایسوسی ایشن کے صدر کے مطابق کچھ کیسز ایسے آئے ہیں جو میچ کیلئے آئے شائقین میڈیکل چیک اپ کا کہہ کر ہسپتال میں بکنگ کا پوچھ رہے تھے۔انہوں نے کہا کہ ہم نے ایسے کیسز کو لینے سے انکار کی ہدایت کر دی جبکہ ڈاکٹرز کا کہنا ہے کہ ہسپتال مریضوں کے علاوہ کسی افراد کو داخل کروانے کیلئے نہیں بنے۔ احمد آباد میں پاکستان ‘بھارت میچ کے جعلی ٹکٹس بھی فروخت ہونے لگے ہیں۔ جعلی ٹکٹ 25 گنا مہنگے داموں فروخت ہو رہے ہیں تاہم بھارتی پولیس نے کارروائی کرتے ہوئے جعلی ٹکٹ بیچنے والے 4 افراد کو گرفتار کرلیا۔احمد آباد میں ہوائی جہازوں کے کرایوں میں بھی 4 گنا اضافہ دیکھا گیا ہے البتہ بھارتی ریلوے نے ممبئی اور احمد آباد کے درمیان 2 سپر فاسٹ ٹرین چلانے کا فیصلہ کیا ہے۔میچ کے دن شہر میں ڈرونز کے اڑانے پر مکمل پابند ی لگائی گئی ہے جبکہ میچ والے دن 11 ہزار سکیورٹی اہلکار ڈیوٹی سر انجام دیں گے۔