پاکستانی پلیئرز کو مناسب ماحول، بہتر انتظامی ڈھانچہ دیا جائے: مکی آرتھر  

لاہور(سپورٹس رپورٹر)پاکستان  ٹیم کے سابق کوچ مکی آرتھر نے کہا ہے کہ پاکستان ٹیم کے کھلاڑی باصلاحیت اور اہل ہیں، انہیں مستقل مزاجی، مناسب ماحول اور بہتر انتظامی ڈھانچہ دیا جائے، حد سے زیادہ تشہیر کھلاڑیوں کو حقیقت سے دور کرتی ہے اور وہ خود کو اپنی حقیقی پوزیشن سے بلند سمجھنے لگ جاتے ہیں۔ پاکستان کرکٹ کے فالوور کے طور پر خیالات کا اظہار کر رہا ہوں۔ کھلاڑیوں کو اچھا ماحول ملے گا تو وہ بہترین کارکردگی دکھائیں گے، میڈیا پر کی گئی منفی باتیں اور ایجنڈے ٹیم کے حق میں ٹھیک نہیں۔ان کا کہنا تھا کہ کھلاڑیوں کی حد سے زیادہ تشہیر ان کے ذہن میں غلط فہمی پیدا کرتی ہے، وہ خود کو اصلیت سے زیادہ بڑا سمجھتے ہیں، پاکستان کیلئے کھیلنا سب سے بہترین وقت ہونا چاہیے۔آرتھر نے نہ صرف کھلاڑیوں کی صلاحیتوں کی تعریف کی بلکہ ٹیم کے مورال اور کارکردگی پر منفی اثرات ڈالنے والے عوامل کا بھی ذکر کیا۔مکی آرتھر نے کہا کہ پاکستانی کھلاڑی بے پناہ صلاحیتوں کے حامل ہیں اور وہی درست کھلاڑی ہیں جو میدان میں موجود ہونے چاہئیں لیکن ٹیم کی کارکردگی میں بہتری کیلئے ضروری ہے کہ انتخاب، ماحول اور انتظامیہ میں تسلسل پیدا کیا جائے۔ ٹیم کے کھلاڑیوں کو ایک واضح ڈھانچے کی ضرورت ہے۔