کابل (اے پی پی) افغانستان ٹیم کی دسویں ساف فٹ بال چیمپئن شپ میں کامیابی پر ملک بھر میں جشن منایا گیا، شائقین نے دھول کی تھاپ پر بھنگڑے ڈالے اور مٹھائیاں تقسیم کیں۔ افغانستان نے فیورٹ بھارت کو فائنل میں 2-0 گول سے ہرا کر پہلی انٹرنیشنل ٹرافی جیت کر نئی تاریخ رقم کر دی۔ ٹیم کی بھارت کے خلاف شاندار فتح پر افغانستان کے شائقین نے خوب جشن منایا، شائقین کا کہنا ہے کہ ٹیم کی بھارت کے خلاف فتح تاریخی کامیابی ہے اور یہ پورے ملک کےلئے اعزاز کی بات ہے اور ہمیں اپنے ہیروز پر فخر ہے۔ شائقین کا کہنا ہے کہ کھلاڑیوں نے ایونٹ میں صلاحیتوں سے بڑھ کر کھیل پیش کیا جس کی بدولت وہ عالمی سطح پر ملک کا پرچم بلند کرنے میں کامیاب ہوئے، ہماری خواہش ہے کہ ٹیم مستقبل میں بھی عمدہ کارکردگی کے تسلسل کو برقرار رکھتے ہوئے مزید ٹائٹلز اپنے نام کرے۔