لاہور( سپورٹس رپورٹر ) پاکستان ہاکی فیڈریشن نے اومان کی جونیئر ہاکی ٹیم کے دورہ پاکستان کی تیاریوں کو حتمی شکل دیدی ہے۔ پاکستان اور اومان کی انڈر 18 ٹیموں کے درمیان چار میچوں کی سیریز 16 سے 20 ستمبر تک نیشنل ہاکی سٹیڈیم لاہور میں کھیلی جائے گی۔ سیکرٹری پی ایچ ایف شہباز احمد سینئر کا کہنا تھا کہ مہمان ٹیم کے خلاف میچز کے موقع پر شائقین کی بڑی تعداد کو سٹیڈیم لانے کے لیے کلچر پروگرام، میوزک شو کے علاوہ لکی ڈرا کے ذریعے انعامات کی بارش بھی ہوگی۔ ان کا کہنا تھا کہ سٹیڈیم میں میچز کو دیکھنے کے انٹری فری ہوگی کسی قسم کا کوئی دعوت نامہ جاری نہیں کیا جائیگا۔ شہباز سینئر کا کہنا تھا کہ پاکستان میں انٹرنیشنل ہاکی سرگرمیوں کے آغاز کے ساتھ ساتھ پاکستان انڈر 18 ٹیم کو ایشیا کپ کی تیاری میں مدد ملے گی۔