کراچی: پولیس مقابلوں میں ایک دہشت گرد 2 ڈاکوئوں سمیت4 ہلاک،13 مشتبہ افراد گرفتار

کراچی(صباح نیوز)کراچی کے علاقے سٹیل ٹائون اور خواجہ اجمیر نگری میں پولیس مقابلوں کے دوران 4 دہشت گرد اور ڈاکو مارے گئے۔ لیاری میں نامعلوم افراد نے فائرنگ کرکے پیپلز پارٹی کے کونسلر کوشدید زخمی کر دیا۔ پولیس کے مطابق گزشتہ روز بلوچ کالونی سے سرچ آپریشن کے دوران 13مشتبہ افراد دھرلیے گئے۔ رشیدآباد سے گٹکا فروخت کرنے والے دو ملزمان پکڑے گئے۔ تفصیلات کے مطابق ایس ایس پی اے وی سی سی عبداللہ احمد کے مطابق پہلے سے گرفتار دہشتگرد عبدالمالک عرف حاجی کی نشاندہی پر گزشتہ روز چھاپہ مارا گیا۔ چھاپے کے دوران دہشتگرد کے ساتھیوں کی جانب سے پولیس پر فائرنگ کی گئی جس کے نتیجے میں گرفتار دہشتگرد عبدالمالک ہلاک ہوگیا۔ پولیس کی جوابی فائرنگ سے ایک اوردہشت گردبھی ماراگیا جبکہ تین اغواکارفرار ہوگئے۔ ہلاک دہشتگردوں کے قبضے سے مغوی مسعود کی گاڑی اور اسلحہ برآمد ہوا۔ مغوی مسعود کو پہلے ہی بازیاب کرا لیا گیا تھا۔ علاوہ ازیں خواجہ اجمیر نگری میں مبینہ پولیس مقابلے میں بھی دو ڈاکو مارے گئے۔ پولیس کے مطابق ملزمان یوسفزئی اور شہزاد پیزا شاپس میں ڈکیتیاں کرتے تھے۔ لیاری کے علاقے کمہارواڑہ کے قریب نامعلوم افراد کی فائرنگ سے کونسلر یو سی تیرہ کامران نور شدید زخمی ہوگئے۔ بلوچ کالونی پولیس نے دادا بھائی ٹائون اور مسلم ٹاون میں سرچ آپریشن کے دوران13مشتبہ افراد کوحراست میں لے لیا۔ رشید آباد پولیس نے کارروائی کرتے ہوئے دو ملزمان کوگرفتار کر کے چارسو پیکٹ گٹکا برآمد کرلیا۔