کراچی(این این آئی)کراچی کے علاقے گلشن حدید لنک روڈ پر پک اپ اور ٹرالرمیں تصادم کے نتیجے میں 6افراد جاں بحق جبکہ 2 زخمی ہوگئے ہیں۔ریسکیو ذرائع کے مطابق کراچی کے علاقے گلشن حدید میں لنک روڈ پرمخالف سمت سے آنے والی تیزرفتار پک اپ اور ٹرالر میں تصادم ہوگیا، جس کے نتیجے میں پک اپ میں سوار8 میں سے 3 افراد موقع ہی دم توڑ گئے ،تاہم فوری طبی امداد کے لیے جناح اسپتال منتقلی کے بعد 5 زخمیوں میں سے 3 افراد نے زخموں کی تاب نہ لاتے ہوئے دم توڑ دیا جب کہ 2 کا علاج جاری ہے۔ریسکیو ذرائع کے مطابق پک اپ میں موجود 3 ماہ کی بچی اس خوفناک حادثے میں معجزانہ طورپربچ گئی جب کہ بچی کی ماں حادثے میں جاں بحق ہوگئی۔ ریسکیو زرائع کے مطابق جاں بحق ہونے والوں میں 30 سالہ عبدالمالک، 5 سالہ معیز، 12 سالہ نعمان،25 سالہ صاعقہ شامل ہیں جبکہ دو افراد کی فوری طور پر شناخت نہیں ہوسکی ہے، لاشوں اور زخمیوں کو جناح اسپتال منتقل کردیا گیا جہاں شناخت اورکاغذی کارروائی کے بعد لاشوں کو ورثا کے حوالے کردیا گیا۔پولیس زرائع کے مطابق حادثہ ڈمپر ڈرائیور کی غفلت کے باعث پیش آیا، تاہم وہ موقع سے فرار ہوگیا ہے۔