لاہور (خصوصی رپورٹر) کنٹونمنٹ بورڈ کے غیرسرکاری غیر حتمی نتائج کے بعد خواجہ سعد رفیق  نے کہا ہے کہ  والٹن کنٹونمنٹ کی 9 کی 9 نشستیں مسلم لیگ (ن) نے حاصل کی ہیں۔ 2015 میں ہم نے 10 میں سے 9 نشستیں جیتی تھیں۔ اس سال ہم نے کلین سویپ کیا ہے۔ لاہور کنٹونمنٹ میں ہم نے 6 نشستیں جیتی ہیں بھٹہ چوک کے قریب 3 پولنگ سٹیشنوں کا رزلٹ نہیں دیا گیا۔ وہ الیکشن رزلٹ آنے کے بعد اپنے دفتر کے باہر جشن کے لئے اکٹھے ہونے والے لیگی کارکنوں سے خطاب  کر رہے تھے۔ انہوں نے کہا کہ تمام مسلم لیگ (ن) کے کارکنوں  کو بہت بہت مبارکباد  دیتا ہوں۔ آج کا دن پاکستان مسلم لیگ ن کی فتح مبین کا دن ہے۔ آج ایک بار پھر زندہ دلان لاہور نے ووٹ کی طاقت سے ثابت کیا ہے کہ نواز شریف لوگوں کے دلوں کا وزیراعظم ہے۔ لاہور کنٹونمنٹ میں ہم نے 6 نشستیں جیتی ہیں بھٹہ چوک کے قریب 3 پولنگ سٹیشنوں کا رزلٹ نہیں دیا گیا۔ لیکن مسلم لیگ ن کے شیروں کے سکیورٹی حصار کو وہ توڑ نہیں سکے۔ پی ٹی آئی کے امیدوار نے ہمارے امیدوار پر حملہ کرایا۔ ایک اور پولنگ سٹیشن کے عملے کو پی ٹی آئی والوں نے 3 گھنٹے یرغمال بنا کر رکھا۔ ہماری آوازوں کو ریاستی جبر کے ذریعے دبایا نہیں جا سکتا۔ خواجہ عمران نذیر نے خطاب کرتے ہوئے کہا کہ پورے پاکستان میں آج شیر ہی شیر بول رہا ہے۔