لاہور(سپورٹس رپورٹر)بھارت نے پاکستان کو شکست دےکر انٹرنیشنل ورچوئل سکریبل چیمپئن شپ جیت لی،بھارت کے مادھو کامتھ نے شاندار کارکردگی کا مظاہرہ کرتے ہوئے انٹرنیشنل ورچوئل سکریبل ٹورنامنٹ کے بیسٹ آف 5فائنل میں پاکستان کے علی سلمان کو شکست دے دی، سری لنکا کے ہیون دلمتھ تیسرے نمبر پر رہے،ٹورنامنٹ کا انعقاد پاکستان سکریبل ایسوسی ایشن کی جانب سے ہیپی ہوم سکول کراچی کی 75ویں سالگرہ کی تقریبات کے موقع پر کیا گیا،چیمپئن شپ میں8ممالک کے 40سے زائد کھلاڑیوں نے حصہ لیا،دو روزہ چیمپئن شپ کے پہلے دن کے اختتام پر ٹاپ دو سلاٹس پر پاکستان کے عفان سلمان اور ان کے بھائی علی سلمان کا قبضہ تھا لیکن بھارت کے مادھو کامتھ نے دوسرے دن انہیں پیچھے چھوڑ کر ٹاپ پوزیشن حاصل کی اور فائنل کیلئے کوالیفائی کر لیا،علی سلمان نے اپنے چھوٹے بھائی عفان کو شکست دے کر فائنل میں کوالیفائی کیا جہاں وہ بیسٹ آف فائیو فائنل میں بھارت کے مادھو کامتھ سے شکست سے دوچار ہوئے،کوئٹہ گلیڈی ایٹرز کے مالک ندیم عمر ایونٹ کے مہمان خصوصی تھے،انہوں نے کھلاڑیوں میں انعامات تقسیم کیے۔