کوروناو ائرس کی وبا سے چھٹکارا حاصل کرنے کے بعد ہندوستان میں ایک نئی وبا نے سر اُٹھا لیا ہے، کیرالہ کے کوزی کوڈ میں بخار سے دو افراد اپنی جان سے ہاتھ دھو بیٹھے، جس کے بعد محکمہ صحت نے نیفا وائرس کا الرٹ جاری کر دیا ہے۔
بین الاقوامی خبر رساں ادارے کی رپورٹ کے مطابق شبہ ظاہر کیا جارہا ہے کہ یہ اموات اسی وائرس کے سبب پیش آئی ہیں، مذکورہ وائرس کے سبب دو افراد کی اموات سامنے آنے کے بعد صحت کے حکام میں کھلبلی مچ گئی ہے۔
یاد رہے کہ اس قبل بھی کوزی کوڈ میں نیفا وائرس کے کیسز سامنے آچکے ہیں، بتایا جارہا ہے کہ کیرالہ میں ایک بار پھر نیفا وائرس سر اُٹھا رہا ہے۔
محکمہ صحت نے اموات کے واقعات رپورٹ ہونے کے ساتھ ہی الرٹ جاری کردیا ہے، سال 2018 میں نیفا وائرس کے جملہ 23 معاملات درج کیے گئے تھے اور درجن بھر سے زائد افراد اپنی زندگیوں سے محروم ہوگئے تھے۔
نیفا وائرس ایک ایسا وائرس ہے جو جانوروں کے ذریعے انسانوں منتقل ہوجاتا ہے، اس کا سب سے پہلا کیس ملیشیا میں سال 1999 میں سامنے آیا تھا اس کے بعد سنگاپور اور بنگلہ دیش میں بھی اس وائرس کے کیسز سامنے آچکے ہیں۔
واضح رہے کہ اس سے قبل کورونا وائرس نے بھارت کو اپنی لپیٹ میں لیا تھا، جس کے سبب ہزاروں افراد اپنی زندگیوں سے محروم ہوگئے تھے۔
