نبی کریم ؐکا یوم ولادت مذہبی عقیدت و احترام سے منایا جائیگا: ڈپٹی کمشنر

حافظ آبا د(نمائندہ نوائے وقت)ڈپٹی کمشنر حافظ آباد عبد الرزاق اور ڈی پی او فیصل گلزار نے کہا ہے کہ حضور نبی کریم ؐکا یوم ولادت باسعادت مذہبی عقیدت و احترام سے منایا جائیگا۔ضلعی انتظامیہ اور پولیس کی جانب سے عید میلاد النبی ؐ کے جلوسوں اور دیگر محافل کی سکیورٹی کے بہترین انتظامات کیے جائینگے ۔ علماء کرام عید میلاد النبی ؐ کی محافل اور دیگر پروگراموں میں عوام کو حضور نبی کریم کے اُسوہ حسنہ ، ارشادات پر عمل کرنے کی تلقین کریں تا کہ ہمارا معاشرہ امن کا گہوارہ بنے اور آپس میں مذہبی ہم آہنگی ،رواداری ، صبرو تحمل اوربھائی چارہ کو فروغ مل سکے ۔ انہوں نے ان خیالات کا اظہار ضلعی امن کمیٹی اور بین المذاہب ہم آہنگی کمیٹی کے اجلاس سے خطاب کر تے ہوئے کیا ۔
اجلاس میں ایڈیشنل ڈپٹی کمشنر جنر ل حمد اللہ، مقامی علماء کرام ، مسیحی برداری کے نمائندے ، کمیٹی کے دیگر اراکین اور ضلعی انتظامیہ ،پولیس اور دیگر متعلقہ محکموں کے افسران شریک تھے ۔ڈپٹی کمشنر کاکہنا تھا کہ ہمیں اپنی دنیا اور آخرت کو بہتر بنانے کیلئے حضور نبی کریم کے احکامات اور انکی سنت  پر عمل کرنا چاہیے ۔ آپ پوری انسانیت کیلئے رحمت بن کر آئے اور یہ کائنات بھی اللہ تعالیٰ نے اپنے پیارے محبوب حضور نبی کریم کے لیے بنائی۔آج ضرورت اس امر کی ہے کہ ہم سب آپ  کی زندگی اور اُسوہ حسنہ پر عمل کرکے ہی ہم اپنی دنیاوی زندگی و آخرت کو بہتر بنا سکتے ہیں۔ اختتام پر دین سلام کی سربلندی ، ملک و قوم کی سلامتی ، استحکام ، امن و امان اور سربلندی کے لیے خصوصی دعا بھی کی گئی ۔