قومی اسمبلی کے حلقہ این اے 171  کے ضمنی انتخاب میں پیپلزپارٹی کے طاہر رشیدالدین  کامیاب ہوگئے ہیں ۔این اے 171 کے ضمنی الیکشن کے تمام 301 پولنگ سٹیشنز کے غیر حتمی غیر سرکاری نتیجے کے مطابق پیپلزپارٹی کے طاہر رشیدالدین 116429 ووٹ لیکر جیت گئے، پی ٹی آئی کے حسان مصطفی 58251 ووٹ لیکر دوسرے نمبر پر رہے۔ضمنی الیکشن کے دوران ٹرن آٹ تقریبا 65 سے 70 فیصد رہا، ضمنی الیکشن کے دوران کئی پولنگ سٹیشنز پر بدنظمی کے واقعات بھی ہوئے۔واضح رہے کہ نشست پی ٹی آئی کے ممتاز مصطفی کے انتقال کے باعث خالی ہوئی تھی۔ دریں اثنا   چیئرمین پاکستان پیپلزپارٹی بلاول بھٹو زرداری نے این اے 171 کے ضمنی انتخاب میں پارٹی امیدوار کی کامیابی پر عوام سے اظہار تشکر کیا ہے۔چیئرمین بلاول بھٹو زرداری نے مخدوم طاہر رشید الدین کو شاندار کامیابی پر مبارکباد پیش کی اور حلقہ کے جیالوں کو شاباش دیتے ہوئے رحیم یار خان کے عوام کا شکریہ ادا کیا۔انہوں نے کہا کہ رحیم یار خان کے عوام نے پاکستان پیپلز پارٹی کی قیادت پر اعتماد کیا، یہ فتح پی پی پی کے ترقی پسند، شمولیتی اور جمہوری پاکستان کے ویژن پر عوام کے اعتماد کا اظہار ہے، مخدوم طاہر رشید الدین کی کامیابی صرف پارٹی کی جیت نہیں بلکہ رحیم یار خان کے عوام کی فتح ہے۔انکا کہنا تھا کہ یہ رحیم یار خان کے ان لوگوں کی فتح ہے، جنہوں نے پسماندگی پر ترقی اور کھوکھلے وعدوں پر حقیقی خدمت کو ترجیح دی، پیپلز پارٹی ووٹرز کی فلاح و بہبود کیلئے کام جاری رکھے گی۔بلاول بھٹو نے مزید کہا کہ یہ مینڈیٹ یاد دلاتا ہے کہ ہمیں ایمانداری، دیانتداری اور شفافیت کے ساتھ عوام کی خدمت کرنی ہے، پیپلز پارٹی ایک خوشحال اور متحد پاکستان کی جدوجہد جاری رکھے گی، ہم اپنے وطن کو ایک ایسا ملک بنائیں گے جہاں ہر شہری کو انصاف، مواقع اور وقار تک رسائی حاصل ہو۔