شعیب اور ثانیہ کے استقبالیے کی تقریب حیدرآباد دکن کے معروف تاج کرشنا ہوٹل میں ہوگی۔ استقبالیے میں بھارتی کرکٹ سٹارسچن ٹندولکر سمیت بالی وڈ کے کئی فنکار شرکت کریں گے۔ اس سلسلے میں آٹھ سو کارڈز تقسیم کیے جا چکے ہیں ۔ شعیب ملک کے خاندانی ذرائع نے تصدیق کی ہے کہ شعیب، ثانیہ کے ساتھ سترہ اپریل کو لاہور پہنچیں گے۔ ادھر وفاقی وزیر بہبود آبادی فردوس عاشق اعوان، کرکٹر سہیل تنویر اور گلوکار وارث بیگ استقبالیے میں شرکت کیلئے بھارت روانہ ہوگئے ہیں۔ لاہور ائیرپورٹ پر میڈیا سے گفتگو کرتے ہوئے وفاقی وزیر کا کہنا تھا کہ وہ ثانیہ کو سیالکوٹ کے شہریوں کی جانب سے سونے کا تاج پہنائیں گی اور صدر و وزیراعظم کی طرف سے سلامی پیش کریں گی ۔