فیصل آباد وولوز چیمپئنز ٹی ٹونٹی لیگ میں بہتر پرفارم کریگی : سعید اجمل

فیصل آباد (آئی این پی) پاکستان کرکٹ ٹیم کے مایہ ناز آف سپنر سعید اجمل نے کہا ہے کہ ان کی ٹیم فیصل آباد وولوز بھارت میں کھیلی جانیوالی چیمپئنز ٹی ٹونٹی لیگ میں بہتر پرفارم کرے گی۔ بھارت میں کھیلی جانیوالی لیگ میں قومی ڈومیسٹک ٹیم کی شرکت مشکوک تھی مگر آرگنائزرز کی جانب سے اعلان کے بعد سعید اجمل نے خوشی کا اظہار کرتے ہوئے کہاکہ یہ پاکستان اور ان کی ٹیم کے لئے اعزاز ہے کہ ہماری ٹیم کو اس ایونٹ کےلئے منتخب کیا گیاہے۔ آرگنائزرز کے مطابق فیصل آباد وولوز کی ٹیم 6اکتوبر سے 17اکتوبر تک کھیلے جانیوالے ایونٹ کے کوالیفائنگ راﺅنڈ میں شرکت کرے گی، اس راﺅنڈ میں آئی پی ایل میں چوتھے نمبر پر آنیوالی ٹیم کے علاوہ پاکستان، سری لنکا اور نیوزی لینڈ کی ڈومیسٹک چیمپئن ٹیمیں حصہ لیں گی۔ سعید اجمل نے کہاکہ بھارت میں کنڈیشنز ہماری ٹیم کو سپورٹ کرینگی، ہماری ٹیم میں اچھے سپنرز موجود ہیں لہٰذا ہم پُرامید ہیں کہ ٹیم ایونٹ کے مین راﺅنڈ تک رسائی حاصل کرنے میں کامیاب ہو جائے گی۔