اسرائیلی شرپسندوں نے مسجد کو آگ لگا دی، اشتعال انگیز الفاظ تحریر

نابلوس(آئی این پی) اسرائیلی فوج کی سرپرستی میں درجنوں یہودی شرپسندوں نے مقبوضہ مغربی کنارے کے شمالی شہر نابلوس میں ایک مسجد پر آتش گیر مادہ چھڑک کر اسے آگ لگا دی۔ خبر کے مطابق، یہ واقعہ نابلوس کے جنوبی قصبے عقربا میں اس وقت پیش آیا جب صہیونی شرپسندوں نے جامع مسجد الشیخ سعادہ پر تیل اور آتش گیر مادہ چھڑکا اور اسے آگ لگا دی۔عینی شاہدین کا کہنا ہے کہ مسجد کو شہید کرنے والے صہیونی مجرموں نے مسجد کی بیرونی دیواروں پر اشتعال انگیز نعرے بھی تحریر کیے۔مقامی شہریوں نے بتایا کہ یہودی آباد کاروں نے رات کی تاریکی میں مسجد کو آگ لگائی جب شہری نماز فجر کے لیے مسجد پہنچے تو مسجد جل چکی تھی۔