لاہور(نامہ نگار)پولیس وقانون نافذ کرنے والے اداروں نے پاکستان نیوزی لینڈ ٹی ٹونٹی کرکٹ سیریز، عیدالفطر کی آمداورمساجد و عبادت گاہوں میں رمضان المبارک کی عبادات کے پیشِ نظرشہر بھر میں جنرل ہولڈ اپ کیا اور چیکنگ ناکے لگائے۔شہر کے داخلی و خارجی ناکوں پر مشکوک اشخاص گاڑیوں کی چیکنگ بڑھا دی گئی ۔عبادت گاہوں، سٹیڈیم ،غیر ملکی قونصلیٹس اور حساس مقامات کے اطراف سرچ اینڈ سویپ آپریشنز بھی کئے گئے۔غازی روڈ، روہی نالہ، بیدیاں روڈ،برکی روڈ، باٹا پور،نشتر کالونی، رائیونڈ روڈ، ملتان روڈ، ائرپورٹ روڈ، والٹن روڈ، سوئی گیس سوسائٹی ڈیفنس، ماڈل ٹاؤن، فیصل ٹاؤن، واپڈا ٹاؤن، کرول جنگل گجر پورہ ،کالج روڈ، باغباپورہ، داروغہ والا، نشاط کالونی،گریٹر اقبال پارک، مستی گیٹ، اولڈ انار کلی، داتا دربار، فورٹ روڈ ،یکی گیٹ، بھاٹی گیٹ کے علاقوں میں خصوصی ناکے لگائے گئے۔سی سی پی او بلال صدیق کمیانہ نے کہا ہے کہ امن و امان برقرار رکھنے اور جرائم پیشہ و امن دشمن عناصر کی سرکوبی کیلئے عبادت گاہوں، مارکیٹوں،نشتر سپورٹس کمپلیکس،کرائم ہاٹ سپاٹس اور حساس مقامات پر ناکے لگائے گئے ہیں۔