سرگودھا‘میانوالی‘ہارون آباد‘کمالیہ میں بارش‘ گندم کی فصل کونقصان 

سرگودھا‘میانوالی‘ہارون آباد‘کمالیہ (نمائندہ خصوصی‘نمائندہ نوائے وقت‘نامہ نگاران) سرگودھا‘میانوالی‘ ہارون آباد اور کمالیہ کے گردونواح میں گردو نوا ح میں بارش سے موسم خوش گوار ہوگیا اور بچوں کے چہرے کھل اٹھے جوعید کے چوتھے روز بھی لطف اندوزی میں مصروف رہے۔بارش کی وجہ سے گندم کی کٹائی کا عمل تاخیر کا شکار ہوگیا۔بجلی کا نظام بھی درہم برہم ہو کر رہ گیا کاروبار زندگی معطل‘ لوگ گھروں میں محصور ہو کر رہ گئے۔ گندم اور چنے کی فصلوں کو شدید نقصان پہنچنے کا خطرہ لاحق ہو گیا۔کندیاں اور گردونواح میں موسلادھار بارشوں نے میونسپل کمیٹی کندیاں کی کارکردگی کا پول کھول دیا بارش سے شہر کی گلیاں کوچے اور بازار جھیل کا منظر پیش کرنے لگے نکاسی آب کا نظام درہم برہم ہونے کی وجہ سے بارشی پانی لوگوں کی دکانوں اور گھروں میں گھس گیا ۔ نشیبی علاقے زیر آب آگئے۔