بنگلہ دیش کرکٹ ٹیم دو ٹیسٹ میچز کی سیریز کیلئے لاہور پہنچ گئی 

لاہور(سپورٹس رپورٹر)بنگلہ دیش کی کرکٹ ٹیم پاکستان کیخلاف دو ٹیسٹ میچز کی سیریز کھیلنے کیلئے لاہور کے علامہ اقبال ایئرپورٹ پہنچ گئی،بنگلہ دیش ٹیم کی آمد کے موقع پر سکیورٹی کے سخت انتظامات کیے گئے تھے، مہمان ٹیم پولیس اور دیگر قانون نافذ اداروں کئے حصار میں ایئر پورٹ سے نجی ہوٹل پہنچ گئی ہے۔ مہمان ٹیم نے گزشتہ روز آرام کیا اور آج سے سیریز کی تیاری کریگی، لاہور کے قذافی سٹیڈیم میں 3دن تک ٹریننگ کے بعد بنگلہ دیش کی ٹیم اسلام آباد روانہ ہو گی،مہمان ٹیم ٹیسٹ سیریز کے پہلے ٹیسٹ میچ کیلئے 21اگست کو راولپنڈی کرکٹ سٹیڈیم میں قدم رکھے گی جبکہ دوسرا ٹیسٹ میچ 30اگست سے کراچی میں شروع ہو گا۔بنگلہ دیشی ٹیم نجم الحسن شانتو کی قیادت میں لاہور پہنچی، ٹیم میں محمود الحسن جوئے، ذاکر حسن، شادمان اسلام، مومن الحق، مشفیق الرحیم، شکیب الحسن شامل ہیں، لٹن قمر داس، مہدی حسن میراز، تیج الاسلام، نعیم حسن، ناہید رانا، شرف الاسلام، حسن محمود، تسکین احمد اور سید خالد احمد بھی ٹیم کا حصہ ہیں۔بنگلہ دیش ٹیم کے اہم رکن آل رائونڈر شکیب الحسن کینیڈا سے پاکستان پہنچیں گے۔