لاہور (سپورٹس ڈیسک ) انٹرنیشنل کرکٹ کونسل کے چیف ایگزیکٹیو ڈیو رچرڈسن نے کہا ہے کہ ورلڈ کپ 2019 کرپشن سے پاک ہوگا۔ کھیل کو شفاف بنانے کیلئے سخت انتظامات کررہے ہیں، حکومتیں بھی فکسرز کو جیل کی سلاخوں کے پیچھے بھیجنے کیلئے قانون سازی کریں۔آئی سی سی کا اینٹی کرپشن یونٹ ان لوگوں کو انگلینڈ کا رخ کرنے سے روکنے کی کوشش کررہا ہے جو کھیل کو آلودہ کرنے کیلئے سفر کرتے ہیں، پورا یقین ہے ورلڈ کپ کرپشن سے پاک ثابت ہوگا۔ ہم کرکٹ کو اولمپکس 2028 کا حصہ بنوانا چاہتے ہیں مگر یہ کہنا آسان اور کرنا بہت مشکل ہے، کرکٹ کی اولمپکس میں شمولیت کیلئے ہمارے 104 میں سے 103 ممبر حمایت کررہے ہیں صرف بھارتی بورڈ کا اپنے ملک کی اولمپک ایسوسی ایشن کے ساتھ کچھ ایشو ہے، البتہ مجھے یقین ہے یہ معاملات بھی جلد حل ہوجائیں گے۔