قائداعظم کے یادگار پورٹریٹ کو مزید بہتر  کرنے کے لئے 5  کروڑ 60  لاکھ روپے جاری

اسلام آباد (این این آئی) سی ڈی اے کی طرف سے بانی پاکستان قائد اعظم کی یادگار پوٹریٹ کو مزید بہتر کرنے کیلئے پانچ کروڑ 60 لاکھ روپے کے فنڈز جاری کر دیئے گئے۔ ترجمان سی ڈی اے کے مطابق اسلام آباد ایکسپریس وے پر لگے قائد اعظم کے یادگاری پوٹریٹ کیلئے 2ایم ایم لوہے کی چادر استعمال کی جائے گی۔ ترجمان کے مطابق پوٹریٹ کی لمبائی 50 فٹ اور چوڑائی 59 فٹ ہوگی۔ پوٹریٹ میں نئے فیچر شامل کئے جائیں گے۔ پوٹریٹ پر لکھے گئے اتحاد، ایمان، تنظیم میں قلعہ روہتاس کے فیچر شامل کئے جائیں گے۔ قائد اعظم کے یادگاری پوٹریٹ کو محفوظ رکھنے کیلئے وال بھی بنائی جائے گی۔