ملائشین ہاکی ٹیم کا شمار خطہ کی بہترین ٹیموں میں ہوتا ہے: سیگفرائیڈایکمین 

لاہور( سپورٹس رپورٹر) پاکستان ہاکی ٹیم کے ہیڈکوچ سیگفرائیڈایکمین نے ملائشین ہاکی کنفیڈریشن کی جانب سے طبی وجوہات کی بناء پر ایشین چیمپئن ٹرافی میں شرکت سے معذرت پراظہار خیال کرتے ہوئے کہا کہ ملائشین ہاکی ٹیم کا شمار خطہ کی بہترین ٹیموں میں ہوتا ہے اور میں چاہتا ہوں کہ پاکستان ایشیاء کی بہترین ٹیموں کے خلاف کھیلے۔ انہوں نے کہا کہ ہائی پرفارمنس سپورٹس کا بنیادی مقصد ہی بہترین ٹیم کے خلاف کھیلنا ہوتا ہے۔ نو تعینات شدہ ہیڈ کوچ قومی ہاکی ٹیم سیگفرائیڈ ایکمین نے کہا کہ دوران ایونٹ میں باریک بینی سے جانچ کرونگا کہ ٹیم کے کھلاڑیوں میں کیا خوبیاں اور خامیاں ہیں اور ہائی پرفارمنس حاصل کرنے کیلئے کن شعبوں میں بہتری لانی ہے۔ انہوں نے کہا کہ پاکستان میں تمام ایشیائی ٹیموں کیخلاف مقابلہ کرنے کی صلاحیت موجود ہے۔ ملائشیا پاکستان کیلئے ایک اچھا ہدف تھا،اسکی شرکت سے مقابلہ کی فضا مزید بہتر ہوتی۔ ہیڈ کوچ پاکستان ہاکی ٹیم سیگفرائیڈ ایکمین نے کہا کہ ملائشین ٹیم کے کھلاڑیوں کے لئے نیک خواہشات کا اظہار کرتاہوں اور انکے کھلاڑیوں کی صحت کے لئے دعاگوہوں۔ میں اْمید کرتا ہوں کہ وہ جلد ہی کھیل کے میدانوں میں جلوہ گر ہونگے۔