قلعہ گجر سنگھ‘ پولیو ورکرز پر اینٹوں سے حملہ‘ ملزم گرفتار‘ مقدمہ درج 

لاہور(نامہ نگار) قلعہ گجر سنگھ پولیس نے پولیو ورکز کو اینٹیں مارنے اور بدتمیزی کرنے والے ملزم کو گرفتار کر کے  ٹیم انچارج کی مدعیت میں مقدمہ درج کر لیا ہے۔ پولیو ٹیم ورکرز یو سی 75 بی بی پاک دامن پولیو ویکسینیشن کے قطرے پلانے کیلئے پہنچی توملزم امتیاز اور فیملی کے دیگر افراد نے پولیو ورکر ٹیم لیڈر کنیز فاطمہ کو گالیاں دیں جبکہ ٹیم ممبر نعمان کو چھت سے اینٹیں ماریں۔ پولیو ٹیم سپروائزر، ایریا انچارج اور یو سی ایم او کے پہنچنے پر ان کے ساتھ بھی بدسلوکی کی۔ سی سی پی او لاہور ایڈ فیاض احمد دیو کی ہدایت پر پولیو ویکسینشن ٹیموں کو بھرپور سکیورٹی فراہم کی جا رہی ہے۔ پولیس ترجمان کے مطابق17 دسمبر تک پولیو ٹیمیں قطرے پلانے گھر گھر جائیں گی۔ جس پر لاہور پولیس نے 169یونین کونسلز میں 6 ہزار 327 پولیو ٹیموں کے لئے سکیورٹی فراہم کی ہے۔ مجموعی طور پر 498 موٹرسائیکل دستے اور 83 موبائل پٹرولنگ یونٹس تعینات کئے گئے ہیں۔ ہر ڈویژنل سطح پر پولیو ٹیموں کیساتھ فوکل پرسنز بھی تعینات کئے گئے ہیں۔