کراچی: گزشتہ روز مہمان ٹیم کے خلاف ٹی 20 سیریز میں 1-0 سے برتری حاصل کرنے والی قومی کرکٹ ٹیم ویسٹ انڈیز کے خلاف اپنا دوسرا میچ آج کھیلے گی۔
تفصیلات کے مطابق پاکستان اور ویسٹ انڈیز کے مابین 3 ٹی 20 میچز پر مشتمل سیریز کا دوسرا اہم میچ آج نیشنل اسٹیڈیم کراچی میں کھیلا جائے گا۔نیشنل اسٹیڈیم کراچی میں آج شام 6 بجے شروع ہونے والے ٹی ٹوئنٹی میچ میں بھی قومی کرکٹ ٹیم ویسٹ انڈیز کے خلاف کامیابی کیلئے پر عزم ہے۔
گزشتہ روز پہلے ٹی 20 میچ میں پاکستان کی ویسٹ انڈیز پر فتح سے قومی کرکٹ ٹیم کی برتری ثابت ہوگئی۔ تکنیکی اعتبار سے میچ میں پاکستان کی جیت کا امکان 79فیصد ہے۔
خیال رہے کہ اس سے قبل سیریز کے پہلے میچ میں پاکستان نے ویسٹ انڈیز کو 63 رنز کے طویل فرق سے فیصلہ کن شکست دی۔ مہمان ٹیم 19 اوورز میں 137رنز بنا کر آؤٹ ہوگئی۔ 
 نیشنل اسٹیڈیم میں گزشتہ روز میچ کھیلا گیا، پاکستان اور ویسٹ انڈیز کے مابین پہلے ٹی 20میچ میں ویسٹ انڈیز کے کپتان نکولس پوران نے ٹاس جیت کر پاکستان کو بیٹنگ کی دعوت دی۔کپتان بابر اعظم اور محمد رضوان نے اننگز کا آغاز کیا مگر بابر اعظم بغیر کوئی اسکور بنائے عقیل حسین کی گیند پر پہلے اوور کی دوسری ہی بال پر آؤٹ ہوگئے۔