بھارت میں انتہا پسندی اور عدم برداشت کا نہ رکنے والا سلسلہ بدستور جاری ہے۔ بھارتی ریاست گجرات کے شہر احمد آباد میں نامعلوم افراد نے بالی ووڈ سٹار شاہ رخ خان کی گاڑی پر پتھراﺅ کیا ہے۔ شاہ رخ خان ان دنوں اپنی فلم ’رئیس‘ کی شوٹنگ کیلئے گجرات کے تجارتی شہر احمد آباد میں موجود ہیں۔ انتہا پسندوں نے کنگ خان کی گاڑی پر پتھر پھینکے اور ان کے خلاف نعرے بھی لگائے۔ شاہ رخ خان گاڑی میں موجود نہیں تھے۔ رواں ماہ کے اوائل میں بھارتی انتہا پسند تنظیم وشوا ہندو پریشد نے بھوج میں ان کی فلم کی شوٹنگ کے دوران بھی احتجاج کیا تھا۔ واضح رہے کہ بالی ووڈ سٹار شاہ رخ خان نے گزشتہ سال دسمبر میں بھارت میں بڑھتی ہوئی عدم برداشت سے متعلق بیان دیا تھا جس پر انتہا پسندوں نے شدید ردعمل ظاہر کیا تھا۔