شرقپور‘ اوکاڑہ‘ گوجرہ میں پی ٹی آئی کی مہنگائی کیخلاف ’’الیکشن کراؤ ملک بچاؤ‘‘ ریلیاں

شیخوپورہ + اوکاڑہ + گوجرہ (نمائندہ نوائے وقت + نامہ نگار) اوکاڑہ حلقہ پی پی 186تحریک انصاف کے راہنما مہر عبدالستار کی قیادت میں ’’الیکشن کرائو ملک بچائو‘‘ ریلی نکالی گئی۔ ریلی میں ہزاروں کارکن شریک تھے مختلف دیہاتوں میں اور چیئرمین عمران خان کا پیغام پہنچاتی رہی۔  ریلی چک نمبر4/4-Lسے شروع ہوئی جیسے جیسے ریلی دیہاتوں سے گذرتی رہی کاکنوں کی تعداد میں اضافہ ہوتا رہا۔ جی ٹی روڈ تک پہنچتے ہی ریلی کے شرکاء کی تعداد ہزاروں میں پہنچ گئی۔ گوجرہ میں تحریک انصاف کے زیر اہتمام’ ملک بچائو الیکشن کرا ئو‘ ریلی نکالی۔ قیادت سابق ممبر صوبائی اسمبلی چوہدرری بلال اصغر وڑا ئچ، امیدوار قومی اسمبلی چوہدری حسام وڑائچ اور امیدوار صوبائی اسمبلی میاں طارق محمود نے کی۔ مقررین نے کہا کہ ملک معاشی مشکلات کا شکار ہے اور  حکومت اپنے نمائندوں کو اربوں روپے کے ترقیاتی فنڈز دے رہی ہے۔ ملک کو لوٹنے والے عوام پر ترس کھائیں جو مہنگائی کی چکی میں بری طرح پس چکی ہے۔ حلقہ پی پی 138 کے امیدوار و سابق ناظم رانا عباس علی خاں کی قیادت میں شرقپور شریف سے سگیاں اور کوٹ عبدالمالک تک مہنگائی کے خلاف اورالیکشن کراؤ ملک بچاؤ مہم کے سلسلہ میں ایک بڑی ریلی نکالی گئی۔ کارکنوں کی بڑی تعداد نے سینکڑوں گاڑیوں پر سوار ہو کر شرکت کی۔ شرکاء ریلی کا مختلف مقامات پر پرجوش استقبال کیا گیا۔ رانا عباس علی خاں نے کہا کہ فوری عام انتخابات کا انعقاد آئین کے تحت اسمبلیوں کی تحلیل کے نوے روز بعد لازمی ہے۔ ایسا بدترین ظلم اور جبر تو مارشل لا کے ادوار میں بھی نہیں ہوا  جو آج کیا جارہا ہے۔ مظالم سے ثابت ہو گیا جمہوریت کے لبادے میں آج بد ترین آمریت مسلط ہے، ہر طرح کے منفی ہتھکنڈوں کے باوجود عمران خان کی قیادت میں تحریک انصاف ثابت قدم ہے۔