اسلام آباد (اے پی پی) سابق چیف سلیکٹر محسن حسن خان نے کہا ہے کہ جنوبی افریقہ کے خلاف ٹیسٹ سیریز کےلئے باصلاحیت کھلاڑیوں پر مشتمل ٹیم کا چناﺅ کیا گیا ہے۔ جنوبی افریقہ کے خلاف ٹیسٹ سیریز میں اچھے اور کانٹے دار مقابلوں کی توقع ہے۔ جنوبی افریقہ کے خلاف 3 ٹیسٹ میچوں کی سیریز کےلئے پاکستان کرکٹ بورڈ نے باصلاحیت کھلاڑیوں کا انتخاب کیا ہے اور ان سے بہت سی امیدیں وابستہ ہیں۔ جنوبی افریقہ کے خلاف ٹیسٹ سیریز میں وکٹ کیپر کا کردار اہم ہوگا۔ جنوبی افریقہ کو اپنے ہوم گراﺅنڈ کا ایڈوانٹیج حاصل ہے۔ جنوبی افریقہ کے خلاف اظہر علی، اسد شفیق اور ناصر جمشید کو اپنی صلاحیتیں دکھانے کا بہترین موقع ہے۔ جنوبی افریقہ کا دورہ یقینی طورپر بلے بازوں کےلئے کڑا امتحان ثابت ہوگا تاہم اس دورے کے دوران پاکستان کے تجربہ کار بلے باز یونس خان، کپتان مصباح الحق اور محمد حفیظ پر بڑی ذمہ داری عائد ہوگی۔ ٹیسٹ سیریز میں احسان عادل اور حارث سہیل سے بھی اچھی امیدیں وابستہ ہیں۔