کراچی (کرائم رپورٹر+ اے این این+ آئی این پی) کراچی کے مختلف علاقوں میں قانون نافذ کرنے والے ادارے نے کارروائی کرتے ہوئے سیاسی جماعت کے 9 کارکن گرفتار کر لئے۔ اورنگی ٹائون میں پولیس مقابلے میں 2 ملزمان زخمی حالت میں گرفتار کر لئے گئے۔ علاوہ ازیںگارڈن فوارہ چوک کے قریب پولیس مقابلے کے دوران ایک ڈاکو ہلاک اور دوسرے کو زخمی حالت میں گرفتار کر لیا گیا۔ کورنگی انڈسٹریل ایریا میں پولیس مقابلے کے بعد دو سٹریٹ کریمنلز آصف اور عبدالجلیل کو زخمی حالت میں دھر لیا گیا۔ دوسری جانب کراچی کے علاقے نیو کراچی صنعتی ایریا کے قریب سہراب گوٹھ میں نامعلوم افراد نے فائرنگ کر کے گھر کے باہر بیٹھے شخص سفیر خان کو موت کے گھاٹ اتار دیا۔ مقتول سیلز مین تھا۔ ڈیفنس فیز ایک میں خالی پلاٹ سے 55 سالہ نامعلوم شخص کی تشدد زدہ نعش ملی جسے پولیس نے ہسپتال منتقل کر دیا۔