ایئرچیف ظہیر بابر سدھو سے کانگو کے چیف آف لینڈ فورسز کی ملاقات

اسلام آباد (خبرنگار خصوصی) ریپبلک آف کانگوکے چیف آف لینڈ فورسزلیفٹیننٹ جنرل سکابویاسندہ فال نے جمعرات کو سربراہ پاک فضائیہ ایئر چیف مارشل ظہیراحمد بابر سدھو سے ان کے دفتر میں ملاقات کی۔ معزز مہمان نے پاک فضائیہ کی پیشہ ورانہ مہارت اور پی اے ایف کی طرف سے گذشتہ سالوں میں بالخصوص خود انحصاری کے میدان میں ہونے والی غیر معمولی پیشرفت کو سراہا۔ ایئر چیف نے کہا کہ دونوں ممالک کے درمیان خوشگوار تعلقات قائم ہیں۔ انہوں نے دونوں فضائی افواج کے مابین موجودہ دوطرفہ تعاون کو مزید فروغ دینے کے عزم کا اعادہ بھی کیا۔ ملاقات کے دوران باہمی دلچسپی اور پیشہ ورانہ تعاون کے مختلف امور بھی زیربحث آئے۔