امریکی اخبار کیخلاف ٹرمپ کی جانب سے دائر مقدمہ خارج

نیویارک(این این آئی)قانونی چارہ جوئیوں کا سامنا کرنیوالے امریکا کے سابق صدر ڈونلڈ ٹرمپ کو ایک اور عدالتی جھٹکا، ٹیکس دستاویز حاصل کرنے کی سازش سے متعلق نیویارک ٹائمز کیخلاف سابق صدر کی جانب سے دائر مقدمہ خارج کردیا گیا، نیویارک کی عدالت نے ڈونلڈ ٹرمپ کو اخبار اور صحافیوں کو چار لاکھ ڈالر دینے کا حکم دیدیا۔سابق صدر ٹرمپ نے سن دوہزار اکیس میں نیویارک ٹائمز اور تین صحافیوں کے خلاف مقدمہ کیا تھا کہ سازش کے ذریعے ان کی ٹیکس دستاویز حاصل کی گئیں۔نیویارک ٹائمز کی تحقیقات میں انکشاف کیا گیا تھا کہ رئیل اسٹیٹ کاروبار سے وابستہ ڈونلڈ ٹرمپ کا یہ دعوی درست نہیں کہ انہوں نے سارا کاروبار اپنی محنت سے بنایا۔تحقیقات میں یہ بات سامنے آئی کہ ٹرمپ نے 413 ملین ڈالر کے مساوی رقم اپنے والد سے حاصل کی تھی اور اس کے لیے ایک شیل کمپنی کا استعمال کیا گیا تھا تاکہ ٹیکس سے بچا جاسکے۔اخبار اور صحافیوں کی جانب سے 2018  میں شائع اس رپورٹ پر  پلیٹزر پرائز دیا گیا تھا۔ نیویارک کی سپریم کورٹ کے کمرشل ڈویژن کے جج نے ٹرمپ کو حکم دیا تھا کہ وہ اخبار کو قانونی چارہ جوئی کی فیس ادا کریں تاہم اب نیویارک ٹائمز کے اس دعوے کو بھی تسلیم کرلیا گیا ہے کہ اس مد میں تین لاکھ بانوے ہزار چھ سو اڑتیس ڈالر دیے جانے چاہیں۔