ریلوے حکام کے مطابق سکھرڈویژن میں بیگماں جی اورروہڑی ریلوے سٹیشنوں کے درمیان ڈاؤن ٹریک پر نامعلوم تخریب کاروں نے ایک بم نصب کررکھا تھا جوآج علٰی الصبح زوردار دھماکے سے پھٹ گیا جس سے ریلوے ٹریک کا تین فٹ کا حصہ مکمل تباہ ہوگیا۔ واقعہ کی اطلاع ملتے ہی ریلوے حکام اوربم ڈسپوزل سکواڈ موقع پرپہنچ گیا اورجائے حادثہ سے شواہد اکٹھے کیے ۔ دھماکے کے بعد ٹرینوں کی آمد ورفت معطل ہوگئی جبکہ پنجاب اور کراچی سے آنیوالی ٹرینوں کو مختلف سٹیشنز پرروک لیا گیا ۔ آخری اطلاع تک ریلوے کا عملہ ٹریک کی بحالی میں مصروف ہے ۔