بہروپئے کشمیر کے دورے پر ہیں‘ مریم ہر صوبے‘ شہر کی بیٹی بن جاتیں: فرخ حبیب 

اسلام  آباد  ( نوائے وقت رپورٹ) فرخ حبیب نے کہا ہے کہ مریم صفدر ہر شہر اور صوبے کی بیٹی بن جاتی ہیں۔ یہ بہروپیے جہاں جائیں وہاں کا روپ دھار لیتے ہیں۔ وزیراعظم کشمیریوں کی موثر آواز ہیں۔ آزاد کشمیر میں تحریک انصاف کی حکومت قائم ہوگی۔ وزیر مملکت اطلاعات فرخ حبیب نے اسلام آباد میں میڈیا سے گفتگو کرتے ہوئے کہا کہ ان کو  کشمیر کی تاریخ کا کچھ پتہ ہی نہیں۔ یہ وہ لوگ ہیں جو شادیوں پر مودی کو دعوت دے کر بلا لیتے ہیں۔ کلبھوشن کا نام لیتے ہوئے ان کی زبان کانپنا شروع ہو جاتی ہے۔ فرخ حبیب کا کہنا تھا کہ کیلبری کی طرح نواز شریف کی کشمیر میں ہونے کی جعلی تصویر لگائی۔ مریم نواز کے جھوٹ کئی بار پکڑے جاچکے ہیں۔ انہوں نے کہا کہ آزاد کشمیر میں تحریک انصاف کی حکومت قائم ہوگی۔ کشمیری جانتے ہیں عمران خان ہی دنیا میں ان کے سچے سفیر ہیں۔ وزیر مملکت اطلاعات نے مزید کہا کہ ن لیگ اور پیپلزپارٹی کے ریکارڈ کی جانچ پڑتال کی اجازت دی جائے۔ ہم نے 40 ہزار ڈونرز کا ریکارڈ جمع کرایا۔ ن لیگ نے 12، پیپلزپارٹی نے 7 اکاؤنٹس چھپائے۔ پارٹی اکاؤنٹس کو بھی منی لانڈرنگ کیلئے استعمال کیا گیا۔