اسلام آباد(نیوزرپورٹر،نمائندہ نوائے وقت)چیئرمین سینیٹ محمد صادق سنجرانی نے سابق رکن قومی اسمبلی میر حمدان خان بگٹی اور سابق ہاکی اولمپئن نوید عالم کے انتقال پر گہرے دکھ و افسوس کا اظہار کیا ہے۔چیئرمین سینیٹ نے دعا کی کہ اللہ تعالیٰ مرحو م میر حمدان خان بگٹی کی مغفرت فرمائے اور ان کے  درجات بلند کرے۔اپنے تعزیتی پیغام میں چیئرمین سینیٹ نے مرحوم کی سیاسی خدمات کو خراج عقیدت پیش کرتے ہوئے کہا کہ مرحوم کی سیاست کیلئے خدمات کو ہمیشہ یاد رکھا جائے گا۔ ڈپٹی چیئرمین سینیٹ سینیٹر مرزا محمد آفریدی، قائد ایوان سینیٹ سینیٹر ڈاکٹر شہزاد وسیم، قائد حزب اختلاف سینیٹ سینیٹرسید یوسف رضا گیلانی نے بھی سابق رکن قومی اسمبلی میر حمدان خان بگٹی کے انتقال پر گہرے دکھ و افسوس کا اظہار کیا ہے۔ انہوں نے اپنے تعزیتی پیغامات میں مرحوم کے اہلخانہ سے تعزیت کا اظہار کرتے ہوئے اللہ تعالیٰ سے مرحوم کی مغفرت اور درجات کی بلندی اور سوگواران کے لئے  صبر جمیل کی دعا کی۔چیئرمین سینیٹ محمد صادق سنجرانی نے  سابق ہاکی اولمپئن نوید عالم کے انتقال پر بھی  گہرے دکھ ا ور  افسوس کا اظہار کیا  چیئرمین سینیٹ نے مرحوم نوید عالم کی شاندار کارکردگی اور خدمات کو خراج عقیدت پیش کیا ۔وفاقی وزیر بین الصوبائی رابطہ ڈاکٹر فہمیدہ مرزا نے سابق اولمپین نوید عالم کی وفات پر دکھ اور افسوس کا اظہار کیا ہے ۔ انہوں نے اپنے ایک تعزیتی پیغام میں کہا کہ مرحوم کی ملک میں ہاکی کے فروغ کے لئے خدمات کو ہمیشہ کے لئے یاد رکھا جائے گا۔انہوں نے دعا کی کہ اللہ تعالی مرحوم کو اپنے جوار رحمت میں جگہ دے اور لواحقین کو صبر جمیل عطا فرمائے۔