کراچی: فائرنگ کے واقعات میں 3 افراد قتل، چھری کے وار سے 2 زخمی

کراچی (کرائم رپورٹر) کراچی کے مختلف علاقوں میں فائرنگ کے واقعات میں 3 افراد قتل اور ایک شخص زخمی ہو گیا جبکہ 2 افراد کو چھری کے وار سے زخمی کر دیا گیا۔ نارتھ ناظم آباد میں قلندریہ چوک کے قریب مسلح افراد نے 22 سالہ مبشر کو فائرنگ کر کے قتل کر دیا اور فرار ہو گئے۔ قبل ازیں اورنگی ٹائون میں بھی فائرنگ کا واقعہ پیش آیا جہاں خلفائے راشدین مسجد کے قریب 30 سالہ دانش ولد محمد مناظر نامعلوم افراد کی فائرنگ کا نشانہ بنا جبکہ اورنگی ٹائون میں ہی سیکٹر فور ای میں جمالی بریانی ہائوس کے قریب 28 سالہ اسد زمان ولد شوکت زمان کو فائرنگ کر کے قتل کر دیا گیا۔ اس کے علاوہ نیو کراچی کے سیکٹر فائیو جے میں نامعلوم افراد کی فائرنگ سے ایک شخص دانش ولد نور الدین زخمی ہو گیا۔ پولیس کے مطابق فائرنگ سے جاں بحق ہونے والے تینوں افراد کی نعشوں اور زخمیوں کو عباسی شہید ہسپتال پہنچانے کے بعد تفتیش شروع کر دی گئی ہے۔ دوسری طرف بلدیہ ٹائون میں جھگڑے کے دوران چھری کے وار سے 2 افراد 35 سالہ عبداللہ ولد ہارون اور 42 سالہ رسول بخش ولد غلام نبی زخمی ہو گئے۔