نواب ٹاؤن‘ ڈاکو گھر سے 7 لاکھ روپے‘ زیورات لے گئے‘ 2 فیملیاں لٹ گئیں

لاہور (نامہ نگار) شہرکے مختلف علاقوں میں ڈاکوئوں اور چوروں نے وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا ہے۔ ڈاکوؤں نے نواب ٹاؤن  میں نذیرکے گھر گھس کر اہلخانہ کو گن پوائنٹ پر یرغمال بناکر7 لاکھ 46 ہزار روپے، طلائی زیورات، موبائل فون اور دیگر سامان، باٹا پور میں عادل اور اس کی فیملی سے اسلحہ کے زور پر 4لا کھ 85ہزار روپے‘ طلائی زیورات‘ شالیمار کے علاقے میں شکور اور اس کی فیملی سے 2 لاکھ 40 ہزار روپے‘ مسلم ٹاؤن میں ساجد کی دکان سے 4لاکھ 14ہزار روپے، مزنگ میں ثاقب سے 3 لاکھ 19ہزار روپے‘ فیکٹری ایریا میں جمیل سے2 لاکھ روپے‘ ستوکتلہ میں امجد سے 89 ہزار روپے‘ رائیونڈ سٹی میں عمران سے42 ہزار روپے‘ ہربنس پورہ میں احمد سے 30 ہزار روپے‘ ہڈیارہ کے علاقے میں فیاض سے24ہزار روپے‘ سندر کے علاقے میں فواد سے16 ہزار روپے لوٹ لئے گئے۔ چوروں نے ہنجروال میںصادق کے گھر سے ڈھائی لاکھ روپے اور طلائی زیورات چوری کر لئے جبکہ چوروں نے ستوکتلہ، جنوبی چھاؤنی اور مصطفیٰ آباد سے 3 کاریں، لٹن روڈ اور باغبانپورہ کے علاقوں سے 2 رکشے جبکہ کاہنہ، اچھرہ، مصری شاہ، سندر، لاری اڈہ، ٹبی سٹی اور مزنگکے علاقوں سے 7 موٹر سائیکلیں چوری کر لی ہیں۔پونچھ روڈ سمن آباد پر چوروں نے نجی بنک کے سامنے کھڑی گاڑی کا شیشہ توڑ کر 30 لاکھ روپے رقم چوری کر لی۔ متاثرہ شہری عثمان گلبرگ کے بنک سے رقم نکلوا کر سمن آباد بنک برانچ میں جمع کرانے آیا تھا۔