رائیونڈ میں تبلیغی اجتماع کے قریب چیک پوسٹ پر خودکش دھماکہ، 5پولیس اہلکاروں سمیت9افرادشہید، متعدد زخمی

شرپسندوں کو لاہورکا امن ایک آنکھ نہ بھایا۔ شہر ایک بار پھر زوردار دھماکے سے گونج اٹھا۔ دہشت گردوں نے اس بار انتخاب کیا رائیونڈ کا جہاں تبلیغی اجتماع جاری تھا کہ قریبی نثار چیک پوسٹ کو دہشت گرد نے خودکش دھماکے سے نشانہ بنایا۔ چیک پوسٹ پر کھڑے پولیس اہلکار اور دیگر شہری دھماکے کی زد میں آ گئے۔ دھماکے کے بعد ریسکیو حکام موقع پر پہنچ گئے اور درجنوں زخمیوں کو طبی امداد کے لیے شریف میڈیکل کمپلیکس، ٹی ایچ کیو ہسپتال رائیونڈ اور جناح ہسپتال منتقل کیا تاہم کئی زخمی شدید زخموں کی تاب نہ لاتے ہوئے دم توڑ گئے۔ ذرائع کے مطابق ایک مشتبہ موٹرسائیکل چیک پوسٹ کے قریب آ کر رکی جس کے بعد دھماکا ہو گیا۔ ذرائع کے مطابق دھماکا اس وقت ہوا جب چیک پوسٹ پر اہلکار ڈیوٹی تبدیل کر رہے تھے۔ واقعے کے بعد سکیورٹی فورسز نے جائے وقوعہ سے شواہد اکٹھے کیے اور علاقے کو گھیرے میں لے کر سرچ آپریشن بھی کیا۔