قصور+ ننکانہ صاحب (نمائندہ نوائے وقت+ نامہ نگار)  ٹریفک حادثات میں ایک بچی سمیت 3 افراد جاں بحق جبکہ خواتین سمیت متعدد افراد شدید زخمی ہوگئے۔ رسولپورہ کا رہائشی وسیم موٹر سائیکل پر جارہا تھاکہ سامنے سے آنیوالے آئل ٹینکر سے ٹکر دے ماری جس کے نتیجہ میں وہ موقع پر ہی دم توڑ گیا جبکہ دو افراد زخمی ہو گئے زخمیوں کو ریسکیو عملے نے بلھے شاہ ڈسٹرکٹ ہسپتال قصور منتقل کردیا آئل ٹینکر اور موٹر سائیکل کو پولیس تھانہ صدر قبضہ میں لیکر مصروف کاروائی ہے جبکہ پولیس نے مقدمہ درج کرلیا۔موضع بلوکی میں چھ سالہ بچی دعا ندیم سڑک کراس کررہی تھی کہ موٹر سائیکل سوار وحید نے اسے ٹکر دے ماری جس کے نتیجہ میں موقع پر ہی دم توڑ گئی۔ علاوہ ازیں موٹروے ایم 3 پر ٹھٹھہ عیسیٰ کے قریب تیز رفتار کار بے قابو ہو کر الٹ گئی، حادثہ کے نتیجہ میں ایک شخص جاں بحق جبکہ 2 خواتین سمیت 3 افراد زخمی ہوئے جاں بحق ہونیوالے کی شناخت 38 سالہ شیر محمد کے نام سے ہوئی، جبکہ زخمیوں میں 42 سالہ رقیہ بی بی، 60 سالہ عائشہ بی بی، 60 سالہ غلام رسول اور 42 سالہ شاہ نواز شامل ہیں۔